A Oma schreibt een (nei)schwowische Beitrag zu eener „megageili“ Veranstaltung:
Die Mini-Playback-Show in Heilbronn

Also liwi Landsleit, in meini villi Johre han ich schun einiges erlebt: Hochzeite, Kerweie, Fasching, Bäler un villes mehr. Awer noch nie a Miniplähbeckschou ! Desweje han ich mich vun meim Englskind erscht mol ufkläre gelosst, was des eigentlich is. Also: uf dere Schou tun Kinner so, als ob se a Lied vun eem große Star nousinge täte. Dabei „staile“ sie sich wie die Große ( des „Autfit“ is „sauwichtig“ ) un versuche ooch sich wie die zu benehme un so wie di zu tanze!

Gut ufgeklärt han ich mich dann am Nomitach des 30. Oktobers 1999 mit meinem Englskind uf de Wech nach Heilbronn ins SKG gemacht. Schun vun drauße han mer gheert, dass do drin mächtich was los is. Un erscht drin: Kinner sin rumgerennt, Musich is „volle Pulle“ vun dr Anlage gelof, die Organisatore sin nervees hin un her gerennt un die „Stars“ wore schun voll ufgeregt beim Schminke. „Oma, do geiht heit mächtich de Bär ab“, soot mei Kleene zu mir.

Was er damit gement hat, wusst ich net, un uf mei Nachfrage soot er: „Die han jo a richtige „Disstschokei“ mit voller Anlage engagiert, des werd heit „voll fett“. Um Himmels Wille, froo ich mich, uf was han ich mich dou ingeloss ? Nou der Begrüßung, un poor Werter zum Ablauf ( sogor a Schüri han se zamgeruf! ) vum Vorsitzende hat unsri scharmanti Bea es Zepter in die Hand khol un richtig „iesi“ durch de Nommitach gfiert. Das vun dene vier geplonti Landkreise eigentlich nur 2 dou wore ( unsri un di vum Kreisverband Heidelberg ) wor ooch ziemlich de einziche Vermutstropfe im ganze Nommitoch. Alles anri wor „supperaffenturbogeil“ ! Hat mei Kleene gsoot.

De Rei nouh: Als Gaschtgewer han die Heilbronner die Schou eröffnet. Total „khuul“ hat de Thomas Till sei erschtes Lied riwwer gebrung un viel Applaus griet. Dann sin die Gäscht aus Leimen an die Reih kum. Een Lied nou eem anri han se gsung, wirklich scheen han se’s gemacht ! Un natierlich viel Applaus dofier kriegt. Ganz toll oongezou un geschminkt wore die zwei Schlümpf. Mir als Oma hat de Vater mit seiner Tochter so gut gfall, die „im Wagen vor mir fährt…“ gsung hat. Mei Kleene hat`s „stark“ gfun, dass so een Alder sich zu de Jungi uf die Bühne traut. Mei Gott denk ich, wenn der schun alt is, na was bin dann ich als Oma?

Uf jede Fall hat es die Jury sehr schwer khat. Bei jedem Lied sin Lobesworte gfall, zu kritisiere gabs nix, un een Uftritt wor besser als de anri. Nou de Leimener is unsri Tanzgruppe dron kum. 16 Mädels zählt zur Zeit die Tanzgruppe des Kreisverbandes Heilbronn un uf die sin mer mächtich stolz ! Bei Schwarzlicht han se uns een scheene, rhythmische Tanz vorgefiehrt. Die hat sogar mir gut gfall, obwohl ich vun dem englischi nix versteh. Awer gwerwich sin unsri Mädels schun ! Wann ich mich nor halb so gut bewege kennt, wär ich schun froh! Noh dem Tanz wor erscht mol Pause.

Nou der Pause sin die Heilbronner dron kum, mit ganz villi Lieder. Di wore „megastark“ un was wes ich wie noch…. Un am End vun jedem Lied hats for de (di) Sänger(in) un die Tänzer im Hinnergrunn Blume gin. Een erschte Platz hat`s kenne gin, jedes Kind hat zum Schluß een scheenes Päckle gschenkt griet. Bedankt hat sich unser Vorsitzender bei unserem Landsmann Hans Klein (stammt aus Grawatz) der di Veranstaltung „gesponsert“ hat. Scheen, das es noch Unternehmer git, di for unsri Landsmannschaft was iwrich han. Denn bei denni Ausloge kann mer mit 5 Mark Eintritt wahrlich „net iwer di Runde kumme“.

Zum Schluß sei mir noch ee Frou erlaubt: Bei deri villi Mih was sich unsri Bea un di Frau Eisele aus Leimen gemacht han, hat sich net noch en Sponsor for zwei Blumestreiß gfun?